நவீன கதையுலகம்

நிஜத்தில் கால் பாவும்

கற்பனை புரவி ஏறி

கடிதாய் பறந்து வந்தேன்

கைநீட்டி நிறுத்தியவர்கள்

குதிரைக் கடிவாளம் பற்றி

உனக்கு மட்டுமே அனுமதி

உள்ளே போ என்றார்கள்..

புரவி மேவி அல்லாமல்

வெற்று நடை நடந்து

நாளாயிற்று என்றேன்

கால்களால் நடந்தால்

புரவிக் கற்பனை

காற்றாய் பறந்து விடும்;

நடக்க நடக்க

இந்த நடை பழகிவிடும்

நடந்து பழகு என்றார்கள்

அடுத்துப்

போர்த்தியிருந்த அழகு ஆடை பார்த்து

பூடகமாய் முகம் சுளித்தார்கள்;

அலங்கார பூச்செல்லாம் வேண்டாம்..

இங்கேயோ புனைவிற்கே

தடா என்றார்கள்.

தலைசுற்றியது எனக்கு.

எனக்குத் தெரிந்த எதற்குமே

இங்கே வேலையில்லை போலிருக்கு

பின் நானெதற்கு?

என்னை ஏன் அழைத்தீர்கள்

என்றதற்குத்தான் இதைச் சொன்னார்கள்

அது உன்னால் முடியும்

மாயக்கதை மந்திரக் கதைகளுக் கிங்கிடமுண்டு

நிகழ்ந்த நிகழ்வுகளையும் மாற்றி எழுத வழியுண்டு

மாற்றி எழுதியதே நடந்த நிகழ்வோ வென்று

நாளைய உலகம் மயங்குவதுண்டு

ஒற்றைப் பொருளை எடுத்து நிறுத்தி

நீட்டி முழக்கலான

வெறும் விவரிப்புகளின்றி

வேறு வேலையில்லை

எழுதும் எதுவொன்றும்

'ஒருமாதிரி' இருந்தாலும் சரிதான்

எடிட் செய்ய மாட்டோம்; எத்தனை பக்கத்திற்கு

வேண்டுமானாலும் எழுத வழியுண்டு என்றார்கள்.

மொத்தத்தில் போகும் பொழுதைப் போக்குவர்க்கு

துணையாக பொழுது போக்க உடன் வரவேண்டும்

அவ்வளவு தான்; சம்மதமா என்றார்கள்

நமக்குச் சரிப்பட்டு வராதுடா சாமியென்று

புரவி மேவிப் பறந்தேன்.